刨東瓜

刨東瓜
莊健：李奧貝納（廣州）執行創作總監
畢業於香港中文大學新聞及傳播學系
黑口黑面從事廣告十三年後正在淡化黑色素


「你姣。鵝嬌疹燒皿！浩永亨應食你。」

隨住愈愈多港人北上就業，本以為我「刨東瓜」會進步為普通話，點知......都仲係照舊。隨住曾特首上京見北大人，握手時間由五秒，上升至十秒，再再升到好多好多秒......證明佢刨東瓜技巧，應該勁，唔流暢都至少唔會窒下窒下，日子有功嘛。呢方面，國內廣告界，就益客戶！佢飽受至少十年聽力測驗後，由聽見「刨東瓜」識笑，到家聽足兩三粒鐘都無反應，淨係搵個地中海對住你......唉，日子有功嘛。
今時今日，唔識兩文三語，點出行呀？我普通話都屬「刨東瓜」一族，今日亦唔係普通話一分鐘，只不過有幾個詞彙發音，想同大家分享下。
個案一：有次北上見客，大型商場之類。同事谷起十成功力，字字咬到彈牙，同時笑容可掬，刻意掩飾自己「刨東瓜」破綻，就係屬於膽大心細面皮厚隻呢。本來，起步唔錯，一路都好順，相信佢擒晚大大聲練好耐。殊不知，由客戶問開始，就料喇。
客問：「哪你們有沒有做過商場的經驗？」
西裝侃侃而談：「有！我們做過ＩＦＣ香腸。ＩＦＣ香腸當年就是找我們做廣告的。ＩＦＣ香腸，是香港最大的香腸，單從九龍方面，一眼就能看到，它是全港最高的香腸！」（當時，我就坐佢左邊，忍笑忍到震。個腦仲幻想香港景度，有條好巨型香腸，就咁擺中環，為香港美景添一份奇趣色彩，蔚為奇觀。註：香腸，國語發音xiang
chang；商場，shang chang）
客，好！冇反應，竟然冇笑，再問：「哪房地產呢？做過什麼？」
西裝答：「有！我們做過強奸地產！」（呢下，連我都一時反應唔到......跟住，明喇，笑爆嘴！註：強奸，qiang jian；長江，chang jiang）
客再問：「哪我想請問，如果要拍照或者拍片，收費又會怎麼樣？」
西裝答：「其實，我們公司是廣告創意公司，專門負責想點子、策畫。如果要拍照拍片，會有第三方公司的加入，而因為我們會監控，所以要收取第三方爆炸的十五百仙。」（爆炸百分之十五？碎片咩？真係笑到都震埋！註：爆炸，bao zha；報價，bao jia）
個案二：有次同客開會，係造家庭電器。西裝部同事，問及客戶過往點樣提高生意額，客戶話都係一般方法，冇乜特別咁啦。呢個時候，西裝義正詞嚴，眼神堅定咁提議話：「不如打劫！在國內，消費者一聽到打劫，就會蜂擁而來！而且你的競爭對手，個個都在打劫，你不打，很不化算。」客戶又好喎，竟然聽得明，仲連嘴角都冇翹起度！我就梗係咬實條，忍笑啦。（呢招幾有效，唔信試試。註：打劫，da jie；打折，da zhe）
個案三：有間廣告公司到深圳見客，面對一大班客，八十幾人坐滿成個大禮堂，創意總監大膽地開始發言：「這次我們的創意點子是......性體驗！」然後，指住客再話：「意思就是說，你跟妳可以有性體驗，他跟他可以有性體驗，她跟妳也可以有性體驗。每個人遇到每個人都可以有性體驗！」客戶笑到人仰馬翻時候，佢旁邊同事，細細聲同佢講，係新體驗，唔係性體驗。（死未？註：性體驗，xing ti yan；新體驗，xin ti yan。少個「g」咋）


講真，要學好「刨東瓜」真係唔易。要刨得順，要刨得手起刀落咁流暢，的確要花時間。仲未得時，唯有問多，記實，必要時寫番個近音字度，提下自己......就好似細個幼稚園時，我Spoon旁邊寫「屎勃」，你咪笑，都幾Work。